பிரேசிலில் வெள்ளம், மண்சரிவில் சிக்கி உயிரிழந்தோர் தொகை அதிகரிப்பு.

வரலாறு காணாத வெள்ளம்

பிரேசிலில் வெள்ளம், மண்சரிவில் சிக்கி உயிரிழந்தோர் தொகை 146-ஆக உயர்வு; 191 பேரை காணவில்லை!

பிரேசில் - மெட்ரோபோலிஸ் நகரத்தில் பேரழிவை ஏற்படுத்திய வெள்ளம் மற்றும் மண்சரிவில் சிக்கி உயிரிழந்தவர்களின் எண்ணிக்கை 146 ஆக அதிகரித்துள்ளது.

பேரழிவுகள் ஏற்பட்டு 4 நாட்கள் கடந்துள்ள நிலையில் தொடர்ந்து 191 பேர் காணாமல் போயுள்ளதால் உயிரிழப்புகள் மேலும் அதிகரிக்கலாம் என அச்சம் வெளியிடப்பட்டுள்ளது.

இதேவேளை, காணாமல் போனவர்களை தேடி, மீட்கும் பணிகள் சீரற்ற காலநிலை காரணமாக தடைப்பட்டுள்ளதாக பிரேசிலிய அதிகாரிகள் தெரிவித்துள்ளனர்.

தொடர் மழை காரணமாக அவசரக் குழுக்கள் சனிக்கிழமை பலமுறை தங்கள் மீட்புப் பணியை இடைநிறுத்த வேண்டியிருந்தது. இந்நிலையில் வெள்ளம், மண்சரிவில் சிக்கி காணாமல் போன யாரேனும் உயிருடன் இருப்பார்கள் என்ற நம்பிக்கை தளர்ந்து உள்ளது எனவும் அதிகாரிகள் குறிப்பிட்டனர்.

அனர்த்தங்களில் சிக்கி இறந்தவர்களில் 27 சிறுவர்களும் அடங்குகின்றனர். பாதிக்கப்பட்டவர்களின் 900-க்கும் மேற்பட்டோர் தற்காலிக இடங்களில் தங்க வைக்கப்பட்டுள்ளனர்.

நேற்று சனிக்கிழமை அடர்த்தியான மூடுபனிக்கு மத்தியிலும் இடிபாடுகள் மற்றும் சகதிகள் வழியாக மண்ணை தோண்டி தேடும் பணிகளில் மீட்பு பணியாளர்கள் ஈடுபட்டிருந்தனர். தன்னார்வத் தொண்டர்களும் மீட்புப் பணிகளில் உதவி வருகின்றனர்.

ஆபத்தான பகுதிகளில் 41 மோப்ப நாய்கள் மற்றும் நவீன கருவிகளின் உதவியுடன் காணாமல் போயுள்ளவர்களை தேடும் பணிகள் இடம்பெற்றன.

கனரக இயந்திரங்களை பாதிக்கப்பட்ட பகுதிகளுக்கு கொண்டு வருவது சாத்தியமில்லை. இருக்கும் வளங்களைக் கொண்டே மீட்புப் பணிகளை முன்னெடுத்து வருகிறோம் என மெட்ரோபோலிஸ் நகர தீயணைப்புத் துறை சிறப்பு மீட்புக் குழுவின் ஒருங்கிணைப்பாளர் ராபர்டோ அமரல் தெரிவித்துள்ளார்.

மிக மோசமான பாதிப்புக்குள்ளான மலைப்பகுதி ஒன்றில் மட்டும் 80 வீடுகள் வரை நிலச்சரிவால் பாதிக்கப்பட்டுள்ளன.

பாதிக்கப்பட்ட பகுதிகளை விமானத்தில் சென்று பார்வையிட்ட பிரேசில் ஜனாதிபதி ஜெய்ர் போல்சனாரோ, போரால் பேரழிவுகளை சந்தித்த பகுதி போன்று நகரம் காணப்படுவதாக தெரிவித்தார்.